Golden Gate apo Porta e Artë në Durrës ka qenë një zbulim arkeologjik i një rëndësie botërore, që do ta shënjonte Durrësin si stacionin primar të rrugës ndërkontinentale të globalizmit romak të quajtur Egnatia deri në Konstandinopojë.
Pavarësisht rëndësisë që mbart, si për ta “lartësuar” më shumë sipër saj ngulën një pallat betoni.
Sot vështirë dikush të dijë diçka rreth saj. Madje dhe në internet informacionet rreth saj janë të pakta.
Auron Tare i ftuar në “Ora e Betit” thotë se turistët që vizitojnë Durrësin e kanë të pamundur të bien në gjurmët e saj pasi mungon sinjalistika jo vetëm e vendodhjes por dhe përshkrimit të rëndësisë dhe vlerave historike që ajo mbart.
Tare: Në Durrës ke betejën më të famshme të botës antike, Çezari dhe Pompei kanë luftuar në Durrës, a ke parë ndonjë tabelë që e thotë këtë gjë? Zero. Në hyrje të Durrësit ku është bërë një pallat mbi portën e çezarëve, aty ka qenë Porta e Artë, aty kalonin të gjithë çezarët. Përveç pallatit që i është bërë siper keni parë ndonjë tabelë që flet për një vend me rëndësi botërore? Zero. Pak kilometra nga Tirana ke vendin që i ka dhënë emrin këtij vendi Albanopolisi, shkoni dhe shikojeni në çfarë drame është. Pak metra më sipër i kanë pas djegur gomat, hiqen gurët etj. Kemi pasur të pallogaritshme dhe nuk dimë ti promovojmë, nuk dimë ti ruajmë, nuk dimë tu kositim barin.
