Në mjediset e Ministrisë për Evropën dhe Punët e Jashtme ka nisur punimet Kuvendi i Tretë i Studimeve Arbëreshe, organizuar nga Qendra e Studimeve dhe Publikimeve për Arbëreshët (QSPA). Tema e këtij edicioni është: “Narrativa të së shkuarës dhe së tashmes në dialektikën diasporë-vendi amë: Arbëreshët dhe Shqipëria”. Kuvendi i Tretë i Studimeve Arbëreshe mbahet çdo dy vjet. Ai përbën ngjarjen më të rëndësishme studimore të organizuar nga QSPA-ja, në këtë pesëvjetor të Qendrës, raporton Agjencia Telegrafike Shqiptare.
Një prej elementeve të veçanta të këtij Kuvendi ka qenë interpretimi i disa pjesëve në arbërisht nga grupi “Arbëria-Frasnita”, nga Frasnita e Kalabrisë.
Fjalën përshëndetëse e ka mbajtur drejtoresha e QSPA-së, prof. Diana Kastrati, e cila ka shpalosur veprimtarinë e institucionit në këta pesë vjet. Kastrati ka theksuar nevojën për qartësi dhe objektivitet në trajtimin e çështjes arbëreshe, larg folklorizmave dhe aktivitete sporadike, me vizionin e duhur që meriton kjo diasporë.
Gjatë moderimit të Kuvendit ka thënë se nëse ka një emblemë të profesoratit, ai është prof. Emil Lafe.
“Është një nga figurat që ka ndjekur dhe shoqëruar jo vetëm arsimimin e shumë brezave, por është një nga kontribuuesit më të qenësishëm të punës në QSPA dhe kemi fatin që e kemi pjesë të Këshillit të Botimeve Shkencore”, ka thënë Kastrati.
Studiuesi Lafe ka vlerësuar organizatorët e Kuvendit.
“Ky institucion i ri i jetës akademike e ka përligjur më së miri veten. Kjo qendër vjen sot në këtë kuvend me një veprimtari të pasur studimore dhe botuese dhe me një vizion të qartë për të ardhmen”, ka thënë Emil Lafe, duke iu referuar QSPA-së.
Sipas profesorit, falë punës së QSPA-së, kultura, historia, letërsia dhe arbërishtja po bëhen më të njohura në rrethet e studiuesve, si dhe për publikun e gjerë shqiptar.
“Bota arbëreshe, si një pjesë shumë e çmuar dhe shumë e dashur e qenies sonë kombëtare, duhet të mbijetojë duke u zhvilluar dhe jo duke u konservuar si objekt i një muzeu historik”, ka thënë Lafe.
Në fjalën e tij, Damiano Guagliardi, kryetar i Federatës së Shoqatave Arbëreshe (Itali), ka thënë se ky kuvend nuk është vetëm fitorja e disa studiuesve, por i përket gjithë komunitetit arbëresh në Itali.
