Kejdi Mehmetaj, ish-deputetja e LSI-së, kërkon nga kryeministri Edi Rama që t’iu kthejnë përgjigje naftëtarëve të Ballshit, të cilët ndodhen prej ditësh në grevë urie.
Nëpërmjet një mesazhi në “Facebook”, Mehmetaj shprehet se Rama gënjen kur thotë se shteti nuk ka asnjë përgjegjësi për naftëtarët.
“Edi Rama-Gënjeshtari patologjik! Ndër lumin e gënjeshtrave që ai tha dje, dua të veçoj ato drejtuar Rafinerisë së Ballshit kur prej dy javësh naftëtarë burra e gra janë futur në grevë urie.Për këdo që nuk e njeh situatën në Rafinerinë e Ballshit duhet të dijë se Kryeministri gënjen kur thotë se ajo është e degraduar, gënjen kur thotë se shteti nuk ka asnjë përgjegjësi kundrejt rafinerisë dhe punonjësve të saj, gënjen kur thotë se ata nuk i duan pagat sociale. Disa herë është shpjeguar publikisht se gjatë privatizimit të ARMO-s shteti shqiptar mbajti rreth 15% të aksioneve pikërisht për të ruajtur interesat kombëtare sa i takon rafinerisë si aset por njëkohësisht edhe punonjësve. Disa herë publikisht naftëtarët kanë shpjeguar se kanë fituar me gjyq të drejtën për të marrë pagat e prapambetura e për zbatimin e këtyre vendime të gjykatës duhet të sigurohen institucionet shtetërore (si përmbarimi).”
Sipas saj, qytetarët duhet të kuptojnë se vjedhja e korrupsioni masiv që oligarkët e Edi Ramës kanë bërë në kurriz jo vetëm të naftëtarëve, por të të gjithë shqiptarëve. Mehmetaj shton se për Ramën, parësor janë interesat e xhepave të tij sesa të vendoset në punë rafineria.
“Disa herë publikisht naftëtarët kanë deklaruar se kur kanë vajtur në zyrat e punës për të kërkuar “pagat sociale” që përmend Edi Rama, u është thënë se ata figurojnë të punësuar. Disa here, naftëtarët publikisht kanë kërkuar të drejtat që u vijnë si rrjedhojë e Statusit të Naftëtarit që qeveria refuzon t’jua njohë. Nga ana tjetër rafineria nuk është e degraduar, ama degradimi i rafinerisë dhe mos vendosja e saj në punë i intereson oligarkëve të Edi Ramës. Së pari që ta përdorin duke mos i paguar asnjë detyrim shtetit e punonjësve e së dyti për të futur në tregun shqiptarë naftën me çmimim më të lartë e abuzues në rajon. Edi Rama që as nuk di e as nuk do të mësojë, sepse për të parësor janë interesat e xhepave të tij, të lexojë raportet e të dëgjojë ekspertët se sa lehtësisht vendoset në punë rafineria. Edi Rama i oligarkëve tu shpjegojë shqiptarëve se çfarë po bëhet me Albpetrolin, vendburimet e saj e punën që bën për nxjerrjen naftës. Kështu edhe qytetarët do e kenë të qartë skemën gjigande të korrupsionit që luhet në sektorin e naftës.”
