“Vendim i padrejtë dhe i gabuar. Është disproporcionale, nuk është realiteti”.
Kështu e konsideron ish-kryetarja e Kuvendit, Jozefina Topalli vendimin e sekretarit amerikan të shtetit, Anthony Blinken për të shpallur non grata Sali Berishën.
Topalli u shpreh e bindur se amerikanët do të heqin dorë nga ky gabim, ashtu siç koha ka treguar se ata dinë të korrigjojnë veten e vet.
Zonja Topalli, çfarë ndjetë kur lexuat Twitterin e sekretarit të Shtetit për Sali Berishën që e shpalli non grata dhe deklaratën e Yuri Kim se do ta luftojë korrupsionin me Lulzim Bashën?
E kujtoj mirë atë moment. Isha ulur, po ndiqja TV, pashë që gazetari po hezitonte kur po e lexonte. Mu duk shumë e ccuditshme që pas 8 vitesh të shpallet non grata një person për korrupsion.
Po të shohësh raportin e TIA, niveli më i ulët i korrupsionit është në atë periudhë. Është ironike, është e padrejtë, shumë e padrejtë, kjo ka qenë ndjesia.
Duke parë zhvillimet e fundit mes Ukrainës dhe Rusisë, një ish-kolegia ime më çoi një pjesë të një libri që kishte shkruar Kissinger, një analizë e një njeriu shumë të madh për zhvillimet mes perëndimit dhe lindjes. Ishte shkruar disa vite më parë, por e vendosur në këtë kontekst, Putini është ai që është. Dhe ajo që ndodh është e tmerrshme.
Por edhe perëndimi duhet të bëjë analizën e vet. Kissinger thoshte duhet t’i jepni mundësi Ukrainës që të mos trembin Rusinë dhe ju nuk duhet të sulmoni kaq ashpër që ta çoni në një reagim kaq të fortë. Por amerikanët dinë të korrigjohen.
Një ish-ministër italian thoshte se edhe në mbledhjen e G7, ju nuk e vlerësuat siç duhej vlerësuar Ukrainën, se ju merreshit gjithë kohës me çështje ‘Gender’. Sigurisht, gjithkush bën gabime.
Edhe non grata-n e konsideroj si diçka që nuk shkon, është disproporcionale, nuk është realiteti. Nuk e di nëse i ka ndodhur kujt pas 8 viteve. Dhe mua më duket e padrejtë dhe e gabuar. Dhe unë besoj se kjo do të korrigjohet ashtu siç perëndimi di të korrigjojë veten e vet.
