Gjykata Kushtetuese e Shqipërisë vendosi të shtyjë për të hënën seancën për shqyrtimin e shkarkimit të presidentit Ilir Meta. Anëtarët e Gjykatës i drejtuan 70 pyetje përfaqësuesit ligjor të presidentit, Bledar Dervishaj, i cili kërkoi 48 orë kohë për t’iu përgjigjur pyetjeve, me argumentin se duhet të informojë presidentin i cili nuk ishte i pranishëm. Seanca për shqyrtimin e shkarkimit të presidentit Meta nisi të martën dhe zgjati rreth 9 orë.
Çështja mbërriti në Gjykatë pasi deputetët e Partisë Socialiste kishin themeluar një Komision hetimor për ta hetuar presidentin Meta për shkeljen e Kushtetutës para dhe gjatë fushatës zgjedhore të prillit të vitit 2021. Deputetët, pas gjetjeve të Komisionit, më 9 qershor të po të njëjtin vit votuan në favor të shkarkimit të presidentit Ilir Meta me 104 vota. Sipas tyre ai ka shkelur Kushtetutën e Shqipërisë pasi me veprimet dhe mesazhet e dhëna në publik nuk ka garantuar unitetin kombëtar, nuk ka moderuar konfliktin politik, por përkundrazi e ka nxitur atë me daljen e organizuar të militantëve të partive politike në rrugë duke terrorizuar qytetarët, duke kufizuar lirinë e tyre të lëvizjes, si dhe lirinë personale, deri në kryerjen e konflikteve me armë”.
