Si sot një vit më parë në Shqipëri nisën të zbulohen rastet e para me Covid-19.
Babë e bir, ishin të parët, të cilët pasi rezultuan pozitiv me coronavirus u shtruan në spitalin infektiv në QSUT.
Vetëm dy ditë pas konfirmimit të rasteve me Covid-19 u shënua edhe viktima e parë prej virusit, e cila ishte një 73 vjeçare në qytetin e Durrësit.
Përgjatë një viti pandemi, muaji shkurt rezulton të jetë muaji me numrin më të lartë të të infektuarve dhe viktimave. Pas identifikimit të dy rasteve të para me Covid-19, në total janë infektuar 114 mijë persona, ndërsa 1 956 prej tyre kanë humbur jetën.
Prej muajit mars të vitit 2020 në vend janë vendosur masa kufizuese për të mbajtur nën kontroll ritmet në rritje të përhapjes së virusit.
Protokollet e sigurisë si, mbajtja e maskës edhe në ambientet e jashtme, ora policore apo ndalimi i grumbullimeve për grupe të mëdha njerëzish kanë qenë disa nga masat e marra nga Komiteti Teknik i Ekspertëve, një grup i posaçëm i krijuar posaçërisht për mirëmenaxhimin e situatës që shkaktoi coronavirusi.
Pandemia ka pasur ndikimin e saj jo vetëm në shëndetin e njerëzve por dhe te bizneset. Masat kufizuese kanë shkaktuar falimentimin ose kalimin në status pasiv të rreth nëntë mijë bizneseve.
Sipas të dhënave të Institutit të Statistikave INSTAT, rreth 50 mijë persona kanë humbur vendin e punës.
Sakaq edhe turizmi ishte një tjetër sektor që u prek drejtpërdrejtë nga coronavirusi. Numri i vizitorëve të huaj në Shqipëri ra me 3.7 milionë persona.
Probleme të tjera të shkaktuara nga COVID-19 u lidhën dhe me dhunën në familje. Izolimi i mbajti njerëzit me periudha të mbyllur në shtëpi dhe si pasojë edhe dhuna në familje pësoi rritje.
