Kryeministri Edi Rama ka komentuar sot deklaratat e bëra nga ambasadorja amerikane në Tiranë, e cila inkurajon liderët e partive politike të kandidojnë në zgjedhjet e 25 prillit persona që të mos jenë subjekt i të ashtuquajturit ligj për dekriminalizimin.
Rama theksoi se në PS për këtë zbatohet ligji, teksa tha se fshehja e të kaluarës është individuale, jo përgjegjësi e partive, për t’u bërë “drejtori policie”.
Si i keni lexuar deklaratat e ambasadores Yuri Kim e cila i ka bërë thirrje liderëve të partive të kenë kujdes për kandidatët që vendosin në lista?
Rama: Ne kemi ligjin, zbatojmë ligjin, përgjegjësia e kujtdo që gënjen në vetëdeklarim është përgjegjësi individuale jo partie. Partitë s’janë drejtori policie por verifikojnë në bazë të lgijit e në bazë të ligjit ne i kemi bërë gjithmonë verifikimet.
Nëse dikush merr përsipër të shkojë para drejtësisë duke bërë vetëdeklarime të rreme është krejtësisht indiviuale.
S’kemi asnjë mundësi të ngremë salla torturash nëpër selitë e partive për të nxjerrë deri në fund nëse dikush fsheh dicka që nuk figuron nëpër letrat që janë në dispozicion.
Ne shohim letrat që janë në dispozicion dhe bëjmë atë që bëjmë ne.
I pyetur për rastin e ish-deputetit Gledion Rahovica, Rama u përgjigj:
“Nuk bëj komente për emra të vecantë se emrat e vecantë janë cështje e procesit që vazhdon e në fund do dalë lista e deputetëve duke u bazuar dhe te puna që bëjnë deri tani që flasim, tek domosdoshmëria për të krijuar një skuader ku të harmonizohet eksperienca e atyre që janë sot dhe energjia e atyre që do përfshihen në skuadrën e re, është e kotë të merremi me emra të vecantë”.
