Në ambientet e Kinemasë “Millennium” u shfaq mbrëmjen e djeshme premiera e dokumentarit kushtuar një prej figurave më të mëdha të teatrit dhe kinematografisë shqiptare, Robert Ndrenika.
Dokumentari, me skenar dhe regji nga Iva Garo dhe Namik Ajazi, i prodhuar nga “Mediavizion”, sjell një rrëfim në vetën e parë ku vetë Ndrenika udhëheq publikun përmes kujtimeve, reflektimeve dhe momenteve më të rëndësishme të karrierës së tij të gjatë artistike.
Përmes dëshmive të kolegëve, miqve dhe bashkëpunëtorëve ndër vite, filmi dokumentar pasqyron jo vetëm figurën e aktorit që ka lënë gjurmë të thella në skenë dhe ekran, por edhe dimensionin e tij njerëzor, të lidhur ngushtë me thjeshtësinë dhe afërsinë me publikun.
I vlerësuar me titullin e lartë “Nderi i Kombit”, Robert Ndrenika mbetet një nga emrat më të rëndësishëm të kulturës shqiptare. Në këtë mbrëmje, vlerësimi për të u shoqërua edhe me Mirënjohjen e Qytetit të Tiranës, akorduar nga Asambleja e Shoqatës “Tirana”, në shenjë respekti për kontributin e tij artistik ndër vite.
Mbrëmja u shoqërua me duartrokitje të gjata dhe emocione të forta nga të pranishmit, duke u kthyer në një homazh për një artist që ka shënjuar breza të tërë me interpretimet e tij në teatër dhe film.
Dokumentari e portretizon Robert Ndrenikën jo vetëm si një aktor të madh, por si një figurë që ka ruajtur gjithmonë thjeshtësinë, dinjitetin dhe fisnikërinë, duke e shndërruar atë në një nga emrat më të dashur dhe më të respektuar të artit shqiptar.
