E pranishme prej 25 vitesh në Mirditë me investime dhe mbështetje për njerëzit në nevojë, humanistja austriake Marianne Graf i ka kushtuar kësaj zone edhe një libër. Në këtë botim, ajo ka përmbledhur historinë, traditat, trashëgiminë kulturore dhe bukuritë natyrore të Mirditës, duke sjellë një pasqyrë të plotë të vlerave që mbart kjo krahinë. Ajo thotë se mungesa e vlerësimit dhe promovimit të duhur të Mirditës, pavarësisht potencialit të jashtëzakonshëm turistik, ishte shtysa kryesore për realizimin e këtij libri.
“Kush në Tiranë ka një kuptim gjithëpërfshirës të asaj që është mjedisi? Aq bukur, aq me zemër, aq interesant, si mund të kuptohet mjedisi pa një prezantim gjithëpërfshirës?”, u shpreh autorja e librit, Marianne Graff.
Në ceremoninë e promovimit morën pjesë autoritete lokale, studiues, historianë, shkrimtarë si dhe ambasadorja e Austrisë në Shqipëri, Monica Zach.
“Ky libër është një libër jashtëzakonisht sintetik dhe shumë përfaqësues. Gjej një Mirditë ashtu siç ajo është në të vërtet”, tha pedagogu Mark Marku.
“Një libër të tillë mund ta shkruante vetëm një individ që e ka shkel me pëllëmbë këtë tokë”, tha shkrimtari Ndue Dedaj.
“Marianne është një njeri i jashtëzakonshëm dhe shumë e veçantë”, theksoi Monica Zach, ambasadore e Austrisë në Shqipëri.
Ky botim pritet të shërbejë si një guidë mjaft e rëndësishme për të gjithë ata që duan ta njohin dhe eksplorojnë Mirditën me gjithçka që kjo zonë ofron në kulturë, histori dhe turizëm.
/rtsh.al/
