Shqipëria po merr vëmendjen e plotë të mediave ndërkombëtare të turizmit për vitin 2026. Media britanike Time Out e përshkruan vendin tonë si një destinacion “të veçantë” që “ecën me ritmin e vet”, duke theksuar se ofron gjithçka: nga plazhet e bukura te historia, qytetet e vjetra dhe natyra e egër.
Sipas artikullit, Shqipëria është një përzierje që funksionon: qytete dinamike, parqe malore, ushqim i mirë dhe një atmosferë që nuk e gjen lehtë diku tjetër.
Në këtë guidë, Time Out rendit 12 destinacionet dhe atraksionet që, sipas saj, janë më të mirat që ofron Shqipëria.
- Tirana
Kryeqyteti i Shqipërisë, dhe i vetmi vend që të jep vërtet ndjesinë e një qyteti të mirëfilltë, Tirana nuk është e mbingarkuar nga e shkuara e saj represive. Përkundrazi, në vend që ta fshehë, ajo e ka kthyer atë në pjesë të identitetit: ish-qendrat e hetuesisë dhe burgjet e komunizmit sot janë transformuar në muze, galeri arti dhe memoriale intriguese. Rreth tyre, qyteti ka ndërtuar një tjetër realitet – me bare “hipster”, restorante dhe një atmosferë që ndryshon vazhdimisht. Në fundjavë, një nga eksperiencat më tipike është të marrësh teleferikun drejt Dajtit dhe të bashkohesh me vendasit për një drekë tradicionale me mish qengji në hell, ndërsa shijon pamjen nga lart mbi gjithë qytetin.
- Qafa e Llogarasë
Duke lidhur Luginën e bukur të Dukatit me Himarën, Qafa e Llogarasë është një nga ato vende që të lënë pa fjalë – jo vetëm në Shqipëri, por në gjithë Europën Juglindore. Rrugë më dramatike se kjo vështirë të gjesh: teksa ngjitesh, kalon mes pyjeve me pisha dhe buzë shkëmbinjve të thepisur, derisa papritur të hapet para syve deti Jon, me një pamje që të ngelet në mendje. Pikat panoramike janë nga më spektakolaret që mund të përjetosh, ndërsa zona është e mbushur me mite dhe legjenda që vetëm sa i shtojnë edhe më shumë magji peizazhit. Për ata që kërkojnë pak adrenalinë, këtu gjen edhe disa nga spotet më të mira për paragliding në rajon – nëse e ke zemrën të fortë.
- Berati
Berati është një qytet fantastik. Poshtë, buzë lumit, shtëpitë janë të ngjeshura fort njëra mbi tjetrën në shpatin e një kodre të mbuluar me gjelbërim, ndërsa dritaret e tyre reflektojnë dritën mbi ujë. Nëse merr ngjitjen e pjerrët drejt majës së kodrës, mbërrin në pjesën tjetër të qytetit – shumë më të vjetër. Një portë mesjetare e restauruar të çon brenda Kalasë së Beratit, ku mes mureve të rrënuara mbijnë lule të egra dhe ku disa kisha e xhami shekullore janë kthyer në muze.
- Plazhi i Gjipesë
Shtegu për në plazhin e Gjipesë, që zgjat rreth 40 minuta në këmbë buzë shkëmbinjve, nis pranë mureve të trasha prej guri të Manastirit të Shën Theodhorit. Fillimi “fetar” i shkon për shtat eksperiencës, sepse sapo të shfaqet para syve ky plazh i vogël me guralecë të bardhë, i vendosur poshtë shkëmbinjve në hyrje të një gryke të mbuluar me gjelbërim, ndjesia është sikur ke hyrë në një parajsë mesdhetare. Atmosfera në Gjipe mbetet e qetë dhe zhvillimi është minimal. Ka vetëm një bar plazhi që funksionon në sezon dhe, pak më lart në grykë, një zonë e thjeshtë për kamping. Nëse shkon në qershor ose në shtator, ka shumë gjasa ta kesh gjithë këtë vend vetëm për vete.
- Gjirokastra
Historia e qytetit të vogël kodrinor të Gjirokastrës, në jug të Shqipërisë, shtrihet të paktën 2,500 vite pas, dhe një pjesë e kësaj trashëgimie ruhet me kujdes në muzeun e qytetit. Sot, shumica e vizitorëve vijnë për të parë rreth 600 shtëpitë madhështore të periudhës osmane që janë të shpërndara në qytet dhe në shpatet përreth, disa prej të cilave janë të hapura për publikun. Qendra e qytetit, e bukur por edhe mjaft turistike (Gjirokastra është një ndalesë e preferuar për turet ditore nga Korfuzi), karakterizohet nga rrugicat me kalldrëm, kafene artistike dhe dyqane suveniresh – disa më pak artistike se të tjerat.
- Shkodra
Shkodra, një qytet i madh që shtrihet buzë liqenit jo shumë larg detit, shpesh nuk përfshihet në itineraret turistike në Shqipëri. Por në fakt, është një surprizë më vete. Me ndërtesa të lyera me ngjyra pastel dhe sheshe elegante, qyteti ka një atmosferë të qartë italiane. Shto këtu historinë dhe kulturën e pasur, dhe ke një destinacion perfekt për një city break. Shkodra ka disa nga muzetë më të mirë në vend, si Muzeu Kombëtar i Fotografisë “Marubi”, që tregon historinë e fotografisë shqiptare, apo Muzeu “Vendi i Dëshmisë dhe Kujtesës”, që pasqyron periudhën komuniste. Përveç kësaj, qyteti ofron një kala të madhe, restorante shumë të mira – ku ndikimi italian ndihet edhe në kuzhinë – dhe plazhe të gjata me rërë vetëm pak minuta larg me makinë. Një tjetër veçori që e dallon është numri i madh i biçikletave, duke e bërë Shkodrën një nga vendet më të mira për t’u eksploruar mbi dy rrota.
- Butrinti
Ndoshta është siti historik më mbresëlënës në Shqipëri. Butrinti është një qytet i lashtë grek i ndërtuar me gurë në ngjyrë të verdhë të artë. Disa nga rrënojat – sidomos teatri, forumi dhe banjat publike – janë ruajtur në mënyrë të jashtëzakonshme, por po aq kënaqësi të jep edhe eksplorimi i pjesëve më pak të njohura të sitit. Për ta bërë edhe më të veçantë, i gjithë kompleksi ndodhet në një ambient shumë të bukur, mes pyjeve me hije dhe buzë një lagune të qetë bregdetare.
- Ksamil
Edhe pse nuk është më ndonjë sekret i fshehur, Ksamili mbetet diçka vërtet e veçantë. I shtrirë mes gadishujve të gjelbëruar, me gjire të vegjël, plazhe që shkëlqejnë dhe ishuj të vegjël përballë, zona ka një pamje që të mbetet në mendje. Turizmi masiv, sidomos nga vendet fqinje pa dalje në det, e ka ndryshuar shumë bregdetin shqiptar vitet e fundit. Megjithatë, Ksamili ka ditur të ruajë atë atmosferën e qetë dhe pa stres që i tërhoqi njerëzit që në fillim drejt Rivierës. Dhe pastaj, për ta mbyllur siç duhet: frutat e detit janë fantastike.
- Apolonia
I fshehur larg gjithçkaje dhe ende pak i njohur për shumicën e turistëve të huaj, Apolonia është një nga ato vende që të surprizon. Rrënojat e qytetit antik ilir, mbi 2,500 vjet të vjetra, shtrihen në kodra të mbushura me ullinj, mes muresh gjysmë të zhytura në tokë, mozaikësh dhe kolonash që të kthejnë pas në kohë. Teatri dhe qendra administrative ruajnë ende një madhështi të dukshme, ndërsa muzeu, i mbushur me objekte me vlerë, ia vlen patjetër një ndalesë. Por përtej historisë, ajo që e bën Apoloninë të veçantë është qetësia. Larg zhurmës dhe turmave, është një vend ku shkon për historinë… dhe qëndron për qetësinë.
- Durrësi
Shpesh i lënë në hije nga destinacionet më “glamour” të jugut, Durrësi mund të jetë një nga vendet më të nënvlerësuara në Shqipëri. Si qyteti i dytë më i madh dhe porti kryesor i vendit, ai bashkon një histori të gjatë me një energji moderne që ndihet kudo. Këtë e përjeton më së miri në kafenetë plot gjallëri ose duke u relaksuar në plazhin e qytetit. Shëtitorja është perfekte për të parë lëvizjen dhe jetën e përditshme, ndërsa për ata që duan të eksplorojnë, ka plot ndërtesa interesante të shekullit të 20-të – ku vila mbretërore e Mbretit Zog mbetet një nga pikat më të veçanta.
- Alpet shqiptare
Alpet shqiptare, të njohura ndryshe edhe si Bjeshkët e Nemuna, në fakt janë gjithçka tjetër veç “të nemura”. Lugina të gjera, livadhe dhe liqene me ngjyra të gjalla jeshile mbushin këtë zonë, ndërsa fshatra të bukur me shtëpi guri shpërndahen mes maleve. Shpatet e mbuluara dendur me pyje marrin ngjyra të forta të kuqe dhe portokalli në vjeshtë, ndërsa majat qëndrojnë për muaj të tërë të mbuluara me borë dhe akull. Është një destinacion perfekt për hiking, me shtigje të shumta, nga ato njëditore deri te aventurat disa ditore që kalojnë përmes maleve. Më i njohuri është itinerari “Peaks of the Balkans”, që lidh Shqipërinë me Kosovën dhe Malin e Zi.
- Dhërmiu
Mund të jetë i njohur në gjithë Europën (dhe më gjerë) si vendi ku zhvillohet i famshmi Kala Festival, por Dhërmiu në fakt është një destinacion i shkëlqyer plazhi për t’u vizituar gjatë gjithë vitit. Ditët mund t’i kalosh duke bërë plazh dhe duke eksploruar gjire të fshehta (madje, nëse ke qejf, mund të provosh edhe pak ngjitje në shkëmb), ndërsa mbrëmjet duke shijuar pije me çmime të përballueshme në baret buzë detit dhe duke ndarë pjata me fruta deti. Ka edhe një pjesë të vjetër të qetë të fshatit, e rrethuar nga gjelbërimi, perfekte nëse do të shkëputesh pak nga gjithë ai relaks.
