Kompanitë farmaceutike Pfizer dhe BioNTech duket se kanë arritur në një marrëveshje që të furnizojnë me vaksinën e tyre kundër COVID-19 edhe platformën Covax, me të cilën Shqipëria ka një marrëveshje dhe tashmë ka bërë parapagesën për doza të vaksinës.
Lajmin e bën me dije agjencia e lajmeve Reuters, e cila i referohet dy burimeve që kanë dijeni mbi marrëveshjen e arritur.
Kjo marrëveshje pritet të shpallet sot, të Premten, sipas burimeve, të cilët nuk pranuan të përmenden me emra për shkak të konfidencialitetit të marrëveshjes, shkruan Reuters.
Detaje të tjera mbi marrëveshjen, si përshembull çmimin për dozë që COVAX do të paguante, nuk janë bërë të qarta, por burimet thanë për Reuters që shpërndarja do të ishte relativisht e vogël.
“Një burim tha se arsyeja për sasinë e kufizuar ishte se dozat ishin të destinuara kryesisht për punonjësit e kujdesit shëndetësor në vendet që COVAX ka marrëveshje”.
BioNTech nuk pranoi të komentonte ndërsa Pfizer nuk iu përgjigj kërkesave për koment të Reuters.
Zëdhënësit e OBSH-së dhe aleancës së vaksinave GAVI, e cila bashkë-drejton platformën COVAX, gjithashtu nuk pranuan të komentojnë.
Këshilltari i lartë i OBSH-së Bruce Aylëard tha të hënën se platforma COVAX ishte në “diskutime shumë të hollësishme” me Pfizer, e cila tashmë ka planifikuar qindra milionë doza këtë vit për disa kombe të pasura dhe pritet të përfshijë vaksinën e saj edhe për COVAX “shumë shpejt”.
COVAX ka deklaruar se ka qëllim të fillojë shpërndarjen e vaksinave kundër COVID-19 në vendet me të ardhura të varfra dhe të mesme në muajin shkurt të vitit 2021.
Kjo platformë gjithashtu ka thënë se shpreson të japë më shumë se 2 miliardë doza të vaksinës anti COVID në të gjithë botën këtë vit.
