“Vallja e ngjalës “dhe “Vallja dyshe Myzeqare”, janë shpallur vlerë kombëtare e trashëgimisë kulturore jo materiale. Dhënia e këtij statusi i shërben përjetësimit të tyre në historinë e kulturës tradicionale shqiptare.
Kriteret specifike janë vjetërsia e valleve, identiteti dhe rëndësia shoqërore. Nga dëshmitë e deritanishme “Vallja e ngjalës “dhe “Vallja dyshe Myzeqare”, janë krijime që lindën brenda një komuniteti dhe janë luajtur tradicionalisht nëpër festa të ndryshme.
“Janë shumë të rëndësishme, janë shumë të vjetra dhe ruajnë dëshmi të paraardhësve tanë. “Vallja dyshe Myzeqare” daton që nga fillimi i pushtimit osman”, historian Niko Ferro.
Pas aplikimit të bërë nga bashkia e Lushnjës këto dy valle arritën të marrin këtë status që i hap rrugën aplikimit për në UNESCO.
“Këto janë një vlerë e shtuar për Lushnjën, por bashkia nuk do ndalet me kaq, por do vijojmë të kërkojmë që të dyja këto valle të përfshihen edhe ne UNESCO”, tha kryetarja e Bashkisë Lushnjë, Eriselda Sefa.
Dy vallet, “Vallja e ngjalës “dhe “Vallja dyshe Myzeqare”, datojnë që nga periudha ilire dhe për këtë qëllim mbeten një pasuri e vyer kombëtare. Ato kanë rrënjë të qarta historike dhe janë transmetuar nga brezi në brez. /rtsh.al/
