Lezha është një ndër qarqet më të goditura nga moti i keq dhe përmbytjet e ditëve të fundit që pushtuan vendin, me sipërfaqen më të madhe nën ujë dhe dëmet më të mëdha materiale.
Pavarësisht se reshjet e shiut janë ndërprerë gjatë ditës së sotme, nën ujë ndodhen ende 2600 hektarë tokë në bashkitë Lezhë dhe Kurbin. Për këtë arsye, 30 familje janë evakuuar nga Emergjencat Civile.
Nga Drejtoria Rajonale e Monumeteve të Kulturës në Shkodër, bëhet me dije se si pasojë e prurjeve të shumta të lumit Mat është dëmtuar rëndë Ura e Zogut. Pas inspektimeve u konstatua se këmba ku mbështetet harku i fundit ka ceduar duke sjellë uljen rreth 15 cm të trasesë së urës, duke rrezikuar seriozisht shembjen e saj.
Niveli i ujërave në lumenj dhe hidrovore në qarkun Lezhë
-lumi Drin, niveli 1.2 m, rënie 0.8 m;
-lumi Gjadër, niveli 6 m, rënie 0.7 m;
-lumi Mat, niveli 3 m, rënie 1 m;
-në hidrovorin Balldre, niveli -1.00 m, nuk ka rënie.
-në hidrovorin Ishull Shëngjin, niveli -0.5 m poshtë kuotës kritike,
-në hidrovorët Gocaj dhe Grykë zezë, 50 cm rënie.
-në hidrovorin Tale, niveli -0.15 m rënie -5 cm.
– në hidrovorin Shllinza, niveli -0.8, rënie 50cm.
– në hidrovorin Droje, niveli 00.00, rënie 40cm.
-hidrovorët punojnë me kapacitet të plotë dhe furnizohen normalisht me energji elektrike.
