3 ditë më parë iu bë atentat në automjetin e tij, ku iu vu 500 gram tritol, 51-vjeçari Preng Gjini, ka dhënë dëshminë e tij përpara grupit hetimor.
Sipas të dhënave të marra nga ky i fundit, Gjini ka mohuar se ka konflikte me familjen Reçi, si e dyshuara nga policia, ndërsa ka mohuar se ruhej, madje ka thënë se ai lëvizte gjatë gjithë kohës në kryeqytet.
Nga ana tjetër, ai ka shtuar, se ka qëndruar në Tiranë disa ditë para atentatit, ku ka treguar edhe kontaktet që ka pasur gjatë qëndrimit. “Kam qëndruar disa ditë në Tiranë. Ditën e atentatit mora makinën e kushëririt, pasi e imja është e madhe për parkim. Nuk kam hasmëri, nuk më kanoset njeri dhe nuk ruhesha. Më është vrarë vëllai por nuk mbaj përgjegjësi për veprimet e tij. Gjatë gjithë kohës nuk kamë vënë re asnjë detaj të dyshimtë. Gjithmonë lëvizja i vetëm dhe nuk kisha frikë që të ruhesha”, deklaroi ai.
Preng Gjinit iu bë atentat me minë të telekomanduar pasditen e së martës në zonën e ish NSHRAK-ut në Tiranë.
Grupi hetimor deklaroi, se ngjarja ka ndodhur për motive hakmarrjeje dhe kishte si qëllim eliminimin e 51-vjeçarit.
Ndërkohë, grupi hetimor, fill pas ngjarjes, ka sekuestruar kamerat e sigurisë së zonës nga ku ka lëvizur Gjini për të rënë në gjurmët e personave që e ndiqnin.
Sipas hetuesve, atentati erdhi si pasojë e një zinxhiri vrasjesh të ndodhura gjatë tre viteve të fundit, duke shënuar 5 viktima brenda dhe jashtë Shqipërisë e që duket se zanafillën e kanë te “humbja” e një ngarkese droge me vlerë 3 milionë euro.
