Më 10 dhjetor 1916, patriotët korçarë shpallën Republikën Autonome të Korçës, duke marrë një vendim historik që ndryshoi rrjedhën e ngjarjeve në vitet e trazuara të Luftës së Parë Botërore.
Kjo ngjarje historike u kujtua sot nga Kryetari i Kuvendit, Niko Peleshi, i cili në një mesazh për publikun theksoi se 109 vite më parë, Korça dhe bijtë e saj shkruan një faqe të artë të historisë shqiptare.
Në një postim në rrjetet sociale, Peleshi theksoi se më 10 dhjetor 1916, patriotët korçarë morën një vendim që ndryshoi rrjedhën e historisë së vendit, duke udhëhequr me guxim dhe mençuri përpjekjet për të ndalur pushtuesit dhe për të mbrojtur integritetin territorial të Shqipërisë në një kohë kur vendi rrezikohej nga synimet aneksuese të fqinjëve.
“Sot nderojmë atë brez që dha një shembull heroizmi dhe mësimin e madh se besnikëria ndaj atdheut nuk ka çmim”, u shpreh Peleshi.
Ai shtoi se sa më shumë vite kalojnë, aq më qartë kuptohet rëndësia e kësaj ngjarjeje, e cila kontribuoi për unitetin, tokën dhe dinjitetin kombëtar.
Sipas tij, Korça dhe bijtë e saj të atyre ditëve “shkruan një faqe të artë të Shqipërisë”, duke lënë një trashëgimi që vijon të frymëzojë brezat e sotëm.
