Pianisti shqiptar Azem Haziri ka performuar muzikë shqiptare në rrugët e Mynihut, duke sjellë emocione të veçanta për komunitetin shqiptar në Gjermani. Haziri, i cili prej 15 vitesh jeton pranë Mynihut dhe merret me muzikë, ka zgjedhur që në çdo festë kombëtare të luajë këngë shqiptare në piano.
Me rastin e 113-vjetorit të Pavarësisë, ai interpretoi këngën “Po ku ka si ti o Shqipëria ime”, duke tërhequr vëmendjen e kalimtarëve dhe duke marrë reagime të shumta nga bashkëkombësit. Emocionet e asaj dite, ai i ka treguar gjatë intervistës me Skype të zhvilluar në emisionin “Në Kohë Reale”.
“Unë jetoj në Gjermani, në një qytet shumë të vogël afër Myhniut. Kam 15 vite që merrem me muzikë dhe luaj muzikë shqip. Kam luajtur 15 minuta, kishte shqiptarë, më kanë dërguar video pas ekzekutimit në piano. Ka shumë shqiptarë që janë të lumtur kur dëgjojnë muzikë shqip kur kalojnë nëpër sheshe”, tha ai.
Pianisti ka performuar edhe në Hagë, ku luajti këngën “Liria ka Emër – Marshi i UÇK-së”, duke u bërë pjesë e protestës për lirimin e ish-krerëve të UÇK-së.
“Mendova të shkoj në një mënyrë ndryshe, kur mora vesh që do bëhet një protestë. Vendosa që me pianon time, përballë Hagës, të realizoj një video. Është pëlqyer shumë nga shqiptarët dhe është një prej videove që kam përjetuar më shumë nga të gjitha. Kam luajtur dy këngë para Hagës,” tregoi ai.
/rtsh.al/
