Në Parkun Arkeologjik të Apolonisë së Ilirisë janë vendosur masa të forta sigurie për të parandaluar vjedhjen dhe trafikimin e objekteve të lashta. Përveç patrullimeve, tashmë përdoret edhe një dron që monitoron zonat me intensitet arkeologjik dhe territoret periferike.
Ekspertët dhe përfaqësuesit e trashëgimisë kulturore pa kufij, kërkojnë një mbrojtje më të fortë, pasi Apolonia, me sipërfaqe 470 hektarë, mbetet shpesh në shënjestër të trafikantëve të artefakteve.
“Takimi i sotëm është pjesë e një programi i cili bazohet në një marrëveshje dypalëshe midis shteteve atij shqiptar dhe Shteteve të Bashkuara që është nënshkruar në vitin 2021 dhe synon të ndaloj tregtinë e paligjshme të objekteve të trashëgimisë kulturore”, u shpreh Eleni Mamani, eksperte “Trashëgimia Kulturore pa Kufij”.
Parku shtrihet në një territor të gjerë dhe objekte të lashta janë gjetur në të gjithë zonën përreth, përfshirë Pojanin, Povelcën dhe Radostinën.
Pas vjedhjes spektakolare të Luvrit, pjesëmarrësit në tryezë theksuan se siguria e trashëgimisë kulturore mbetet ende relative.
“Masat kanë qenë gjithmonë në rritje, jo vetëm me trajnimin e stafit, me shtimin e infrastrukturës ndihmesë por edhe me monitorimin e territorit”, tha Ornela Dyrmishi, Drejtore e Parkut Arkeologjik.
Në vitin 2017, policia e Fierit arrestoi dy persona dhe sekuestroi 230 objekte antike të vjedhura nga nëntoka përreth Apolonisë, të destinuara për tregun e zi. – RTSH-
