“Midis tharjes dhe vërshimit- Prespa e madhe, liqeni që po avullon”. Një imazh i Atdhe Mullës, na zhyt në pasojat e ndryshimit të klimës në vend. Matanë, janë përmbytjet, uji që nuk kontrollohet e shkatërron.
Toka që gllabërohet, në prag të humnerës. Mandej shpyllëzimi, si kafshimi i “mushkërive të planetit”.
Pirgje plehrash, plastikë, zjarre që shkrumbojnë pyje e shkurre, pamje të natyrës që tkurret dhe pasojave të ngrohjes globale që merr terren.
Nën titullin “as dritës së kuqe”, “Faktoje” ka çelur një ekspozitë që dëshmon ndryshimet në Qendrën Kulturore “Tulla” në Tiranë.
“Titulli shërben për të treguar emergjencën në të cilën ndodhemi sa i takon çështjeve të klimës”, tha Klodiana Kapo, nga “Faktoje”
Imazhet tregojnë një Shqipëri të zhveshur, ku kafshët kanë lënë habitatet e tyre. Histori të vërteta të Shqipërisë e shqiptarëve, duke trajtuar tema si ajri, uji, zjarret dhe toka. Ambasadori i BE-së në Tiranë ndërsa theksoi rëndësinë e natyrës e lidhi atë me direktivat europiane.
“Këtë verë e kemi dëshmuar të gjithë sesi ndryshimet klimatike e kanë përkeqësuar ndjeshëm mjedisin, dhe kanë çuar në rritje të temperaturave. Në 15 vitet e fundit e kemi ndihmuar Shqipërinë me 2 milionë euro për këtë çështje, mbështetje e përdorur për të mbështetur ndryshimet klimatike, biodevirsitetin, sistemet e ndotjes etj.
Ne duam ta mbështesim Shqipërinë për të përmbushur detyrimet në kuadër të kapitullit 27 që është edhe më i rëndësishëm. Nuk është puna vetëm tek miratimi i ligjeve në përputhje me BE-në, por edhe tek zbatimi i ndryshimeve ligjore, kjo e bën edhe rrugën më të lehtë në integrim”, tha Gonzato.
Tërheqja e liqenit, thatësira, moçalet, erozioni, janë pasoja e ndryshimeve klimatike që shërbejnë si këmbanë alarmi, jo vetëm për institucionet por edhe për individët./News24
