Në Parkun Antik të Antigonesë vijojnë gërmimet arkeologjike nga një ekip italo-shqiptar, i cili çdo vit zhvillon studime të thelluara shkencore në këtë zonë me rëndësi historike.
Sipas arkeologëve italianë, parku përbën një interes të veçantë për nga pasuria e tij kulturore dhe historike.
“Kemi dy javë që kemi nisur gërmimet këtu në Antigone nga Universiteti i Maceratës, që e bën këtë prej katër vitesh. Këtë vit po vazhdojmë atë që lamë vitin e kaluar. Kemi përfunduar disa gërmime dhe kemi hapur disa të tjera, të gjitha në zonën e agorasë. Kemi gjetur mure të reja dhe kemi vazhduar të gërmojmë në sektorin VIII,” shprehet një arkeolog italian.
“Më pëlqen arkeologjia, sepse dua të kem eksperienca të ndrshme, si në Itali, si jashtë saj. Mbi të gjitha ta ndaj këtë eksperiencë me të tjerët, pasi kemi të përbashkët historinë. Gërmimet po shkojnë shumë mirë dhe më lejojnë të mësoj çdo ditë gjëra të reja,” tregon një arkeologe italiane.
Ndërkohë, drejtuesi i parkut, Shkëlqim Guçe, thekson se qëllimi kryesor i këtyre gërmimeve është identifikimi dhe zbulimi i teatrit antik të Antigonesë.
“Është një element i domosdoshëm ky teatër, sepse siç dihet parqet arkeologjike apo qytetet antike kanë pjesët kryesore akropolin, agoranë, nekropolin dhe teatrin. Kështu që teatri i mungon Antigonesë,” thotë z. Guçe.
Gërmimet pritet të vazhdojnë edhe për dy javë të tjera, ndërsa çdo zbulim i ri do të dokumentohet me kujdes dhe do të shërbejë për pasurimin e njohurive mbi këtë qytet antik. – RTSH-
