Kreu i qeverisë Edi Rama, i është rikthyer edhe një herë çështjes së nxehtë të detit. Rama ka komentuar sërish lidhur me dekretin e miratuar nga Greqia, për t’u zgjeruar me 12 milje në detin Jon. “Kjo është pjellë e marrëzisë shqiptare”, shprehet Rama, duke nënkuptuar se pas kësaj fshihet Ilir Meta dhe Sali Berisha. Akuzat ndaj tij për tradhti kombëtare, Rama i quan si të qëllimta nga ata që duan ta shfrytëzojnë këtë çështje për kapital politik.
“Çfarë ti themi ne shtetit grek, kur këtë e prodhon mendja e autoritetit më të lartë në Shqipëri, dhe ish-autoritetit, presidentit dhe ish-presidentit, kjo është gjëja më elementare e mundshme.
Këta janë autorët e marrëveshjes së 2009, mos harroni. Ishte këmbëngulja jonë, qartësia jonë që pala greke erdhi në tavolinë dhe filluam të negociojmë një marrëveshje të re për të dyja palët.
Jo për faj të palës greke, por për këta që kanë marrë përsipër të mbrojnë detin, të fajtorëve të 10 viteve më parë. Ka qënë kërkesa jonë që në fillim që ta zgjidhim këtë punë me gjykatë, nuk donte pala greke që të shkonim në gjykatë.
Këtu jemi sa herë teshtin apo kollitet dikush në Athinë, këtu plas rrufa e madhe për luftë me pushtet këtu. O unë jam agjent turk që luftoj me Greqinë, ose agjent grek që luftoj me Turqinë. Jam kryeministër i Shqipërisë që nuk negocioj për interesat e shqiptarëve. Është e turpshme që një shtet të bëhet qesharak”.
