Kryeministri Edi Rama, ka bërë një rrëfim për Blendi Fevziun, ku fillimisht e shëtiti Fevziun në disa metra katrorë, mes objekteve që mban në zyrë. Më pas, Rama u shpall një anti-komunist radikal të cilin PD-ja nuk e meritonte dhe rreth fundit të rrëfimit, Rama shpjegoi varfërinë ku ka jetuar, shtëpitë me qira ku rrinte dhe pastaj shfaqjen e Linda Ramës, që e bëri me shtëpi në formë vile, të ndërtuar mbi një tokë që e kishte që prej viteve 2000.
Rama e siguroi Fevziun, se ai nuk i do fare paratë, por vdes për librat…
Në fund, Rama deklaroi se shtëpia e tij në Surrel, pra ajo në formë bunkeri, do të kthehet në pikë referimi nga pikëpamja arkitekturore.
“Fatkeqësisht shumica e njerëzve mendojnë se të merresh me politikë, do të thotë të bësh para, të shkelësh majtas djathtas dhe të jetosh përtej mundësive të tua. Unë nuk kam me paranë assnjë lloj raporti të veçantë. Kam pasione jo të shtrenjta.
Kam patur fatin të mos i ndrydh pasionet për shkak pamundësie, sepse i kam patur mundësitë t’i ushtroj. Jam i dhënë pas artit, librave, shqip-shkrimit, kësaj pune, këto nuk kërkojnë asgjë përtej mundësive që unë kam.
Jam rritur në një shtëpi ku është folur për paranë, ose për pasurinë, në një formë të caktuar, që me siguri më ka ndikuar, është folur për stërgjyshin, që nuk ishte as i pasur dhe as i varfër, që pasurinë e vuri në dispozicion të ndërtimit të një shkolle. Është folur për gjyshërit, që financonin me sa mundësi kishin…
Jemi rritur në një shtëpi si gjithë të tjerët, në një pallat ku ndërroi jetë nëna ime, ku kemi jetuar gjithë jetën, kemi bërë rradhën e qumështit… Im at më ka rrënjosur që i vogël diçka që më ka shënjuar dhe e kam edhe sot e gjithë ditën, mos kërko kurrë asgjë përveç librave!
Cila është jeta që bëj? Jam njeri jo i dhënë pas udhëtimeve, të vë shenjën në çdo pikë të globit. Kur udhëtoj, e bëj për arsye pune. Nuk jam njeri i restoranteve. Nuk I kam fare këto…
Sa i përket shtëpisë time, ajo nuk është vilë. Ajo është një nga gjysmë million shtëpitë që janë ndërtuar në Shqipëri. Në shtëpinë ku jetojmë ne, ngado të kthesh kokën, janë vila tre-katër katëshe, nuk ka politikanë aty.
Unë vetë, deri ditën kur jam bërë burri i Linda Ramës dhe kam shumë fat që jam burri i Linda Ramës, kam patur idena që unë jam shtëpia ime. Unë jetoja me qira, shtëpitë e mia me qira kanë qenë minimaliste. Linda, mendon se shtëpia është hapësirë ku zhvillohet historia, mblidhen kujtimet.
Ajo kishte një tokë që në vitet 2000 dhe kështu erdhëm tek ideja të bëjmë shtëpinë, është kontribut i saj, ajo e di mirë të gjithë historinë dhe ajo është një hapësirë e shtrirë në një kat. Ka një veçanti që muret e brendshme dhe të jashtme i ka një, por do të vijë dita që do të jetë pikë referimi nga pikëpamja e arkitekturës.
Nuk kam asnjë qindarkë që është në xhepin tim dhe është fituar nga puna e të tjerëve”, tha Rama.
