Fotografia është profesion, por e ndërthurur me udhëtimet në atraksionet e preferuar shndërrohet në pasion frymëzim.
Kështu mes planeve për të vizituar Shqipërinë në çdo cep të saj dhe dëshirës për të fokusuar në objektivin e aparatit peizazhet më të bukura 400 fotografë dhe videografë profesionistë dhe amator nga Shqipëria dhe 36 vende të botës u bënë pjesë e edicionit të dytë të Konkursit Ndërkombëtar “Wanderlust in Albania”.
Përmes imazheve dhe filmimeve, shpaloset Shqipëria e para në sytë e vizitorëve, me bukuritë e natyrës dhe trashëgimisë kulturore e historike.
“Tashmë Shqipëria nuk është thjesht një destinacion turistik që po zbulohet, por është një frymëzim që po shpërndahet dhe po përjetohet globalisht. Pjesëmarrja e gjerë në këtë konkurs tregon se jo vetëm interesi ndaj Shqipërisë turistike është rritur me ritme të shpejta, por është rritur edhe angazhimi ndërkombëtar në promovimin e Shqipërisë turistike”, u shpreh drejtoresha e Agjencisë Kombëtare të Turizmit, Zana Çela.
Juria ndau 40 çmime në kategortë Peizazh; Monumente dhe Site arkeologjike; Folklor; Artizanati dhe Zejtaria; Agroturizëm dhe Kulinari; Ekoturizmi dhe Turizmi sportiv; Arkitekturë.
“Unë jam udhërrëfyese turistike prej 5 vitesh dhe udhërrëfyesi në vetvete është promovues i turizmit të Shqipërisë. Unë bëj atë që dua më shumë, të promovoj Shqipërinë tonë të bukur”, rrëfeu Melisa Shabani, fituese e çmimit të publikut.
Risi e këtij edicioni ishte kategoria CGI, ku integrohet arti dixhital dhe animacioni. Fituesi i këtij çmimi tregon teknikën e përdorur.
“Kemi produkte të ndryshme sikurse janë programet 3D dhe programet vizuale, e gjitha puna integrohet për të sjellë atë videon ku është Tirana kryeqyteti shqiptar dhe shqiponja”, tregoi fituesi i çmimit në kategorinë “CGI”, Igli Mjalti.
Një pjesë e fotografive dhe video reels do t’i shtohen fondit të Agjencisë Kombëtare të Turizmit, ndërsa organizatorët ju ftojnë të udhëtoni gjithnjë me zemër të hapur dhe kamerën ndezur.
