“Unë mund të heq dorë nga gjithçka, po jo nga mendimi”, kështu do të shprehej mendimtari, gjuhëtari dhe publicisti Arshi Pipa, për të cilin u organizua këtë të hënë një aktivitet kushtuar 104 vjetorit të lindjes së tij.
Në fjalën e saj, Drejtoresha e QKLL-së, Alda Bardhyli, vlerësoi kontributin e Pipës në letrat shqipe si një studiues të rëndësishëm të historisë sonë letrare.
I nipi, Plator Kalakula u shpreh për Pipën se ishte një njeri i thjeshtë.
“Ajo që më ka bërë përshtypje është se si ky njeri që jetoi në SHBA, kishte një vëmendje të patjetërsueshme për atdheun e vet. Kishte një patriotizëm të tejskajshëm, pavarësisht torturave” –thotw nipi i shkrimtarit.
Po ashtu u prezantua libri “Kur Sigurimi merrej me shkencë”, një botim 4 vjeçar i Autoritetit për Informimin mbi Dokumentet e ish-Sigurimit të Shtetit.
Gentjana Sula, Kryetare e Autoritetit për Informimin mbi Dokumentet e ish-Sigurimit të Shtetit tha mes tjerash se dosja e përndjekjes së Pipës është ndër më voluminozet e së shpejti do të jetë pjesë e një aktiviteti të hapur.
Arshi Pipa ka qenë arsimtar, publicist, poet, gjuhëtar, kritik letrar, përkthyes dhe pedagog shqiptar.
I përndjekur nga regjimi komunist, u arratis dhe pasi u vendos në Shtetet e Bashkuara u bë një nga intelektualët më të rëndësishëm të diasporës shqiptare.
Arshi Pipa vuajti në burgjet dhe kampet e shfarosjes nga viti 1948, ndërsa shkroi librin me poezi “Libri i Burgut”.
