Është një ditë feste, dukej si një ditë çlirimi për shqiptarët.
Më 22 mars të vitit 1992, pas 48 vjetësh dominim të Partisë së Punës, Partia Demokratike arriti të fitonte bindshëm zgjedhjet e parakohshme. Një vit më parë, në mars të 1991, ishin mbajtur zgjedhjet e para pluraliste dhe Partia Demokratike e Shqipërisë nuk arriti të fitonte shumicën në parlament.
Më 22 mars 1992, PD fitoi shumicën absolute të vendeve në parlament. Në këto zgjedhje, Partia Demokratike nuk garoi e vetme, por duke krijuar një koalicion me Partinë Republikane dhe Partinë Social Demokrate.
Zgjedhjet u fituan bindshëm nga Partia Demokratike me 62.08% të votave (92 vende). Partia Socialiste arriti vetëm 25.70% (38 vende), Partia Social Demokrate 4.30% (7 vende).
Ky moment ishte historik për Shqipërinë. Partia e Punës nuk do të ishte më në krye të qeverisjes së vendit, kurse Partia Demokratike, si forcë e parë, ndryshoi kursin e politikës.
Gara u ndje edhe te mediat e asaj kohe. Fushata mediatike u zhvillua midis gazetës së PS-së “Zëri i Popullit” dhe gazetave të opozitës “Rilindja Demokratike”, “Republika” dhe “Alternativa SD”.
Pas zgjedhjeve Aleksandër Meksi u zgjodh kryeministër dhe Sali Berisha President.
32 vite pas asaj dite historike, fatkeqësisht PD nuk është në ditët e saj më të mira. E majta mban pushtetin prej 11 viteve, ndërsa e Partia Demokratike në opozitë vazhdon të jetë e përçarë, sepse, sipas atyre që e themeluan, pas ardhjes në pushtet nuk ndoqi idealin dhe parimet e djathta çka zhgënjeu elektoratin. Sot PD-ja dhe e djathta në tërësi është pikërisht para kësaj sfide.
