Zona arkeologjike Bylis-Klos njihet si një nga peizazhet më të rëndësishme historike dhe kulturore në Shqipëri, që shumë shpejt do t’i nënshtrohet një koncepti të ri konservues.
Siç bëhet me dije nga Ministria e Turizmit, Kulturës dhe Sportit, po ndërmerren hapa të rëndësishëm për ruajtjen, administrimin dhe promovimin e këtij parku arkeologjik, duke synuar konservimin e vlerave historike dhe zhvillimin e tij si një destinacion i rëndësishëm kulturor dhe turistik.
Në këtë zonë ndërthuret trashëgimia e qytetërimit ilir me historinë antike dhe peizazhi unik i Mallakastrës.
Qyteti antik i Bylisit, një nga qendrat më të mëdha ilire, së bashku me Nikajën (Klosin), një nga qendrat kryesore të Koinonit të Bylinëve, përbëjnë një dëshmi të rëndësishme të organizimit politik, urban dhe kulturor të antikitetit.
