“Nuse” është filmi dokumentar që sjell në ekranin e madh të kinemasë, këndimin e grave të Zadrimës, si formë kujtese dhe rezistence kulturore.
Ai është krijim i kompozitorit Robert Bisha, i cili gjithashtu sjell muzikë origjinale të kompozuar nga vetë ai, në procese kompozitive elektroakustike.
Filmi dokumentar synon të jetë një formë denoncimi ndaj diktaturave të shpronësimit, të identitetit, duke artikuluar një kritikë ndaj sistemeve që përvetësojnë dhe heshtin kujtesën kulturore.
Autori e sjell këtë vepër me konotacion kryesisht etnomuzikologjik, artizanal por dhe politik, historik, duke sjellë kujtesën e tranzicionit.
“Nuse” nuk përcjell asnjë ngjarje rituale specifike, por pasqyron arketipin e çdo rituali, i cili reflektohet në këngët e nusërisë. Zërat e grave dhe artikulimet e pasura në thjeshtësinë e tyre monodike, tregimet e disa eventeve historike të përjetuara, poetika shpesh herë edhe mistike e teksteve përmes pasurisë ritmike të dialektit geg, të melizmave dhe minimalizmit strukturor të këngëve, bëjnë që “Nuse” të depërtojë ëmbël në rrëfim.
Dokumentari do të shfaqet sonte në Qendrën e Artit Agimi dhe mbështetet nga Fondi Kulturor Zviceran, një projekt i Agjencisë Zvicerane për Zhvillim dhe Bashkëpunim (SDC), zbatuar nga Qendra për Biznes, Teknologji dhe Lidership (CBTL). /Tema
