Kryeministri i Shqipërisë, Edi Rama, dje ka qëndruar për vizitë pune në Bullgari, ku është takuar me presidentin bullgar Rumen Radev, si dhe homologun e tij Stefan Janev, informon Zhurnal.
Gjatë një konference të përbashkët në Sofie, Janev, tha se marrëdhëniet mes Bullgarisë dhe Maqedonisë së Veriut duhet të zgjidhen nga vetë ata, pa përfshirjen e palëve të treta, në këtë rast, nuk duan të përzihet fare Shqipëria.
I vetëdijshëm se me veton ndaj Maqedonisë po bëhet pengesë edhe për rrugën europiane të Shqipërisë, ai tha se shoqëria shqiptare nuk duhet ta shohë Bullgarinë si pengesë dhe se do të bëjnë më shumë për ta mbrojtur edhe përballë partnerëve europianë qëndrimin e tyre.
Pas takimit me presidentin Radev, Rama përmes një statusi në FB ka njoftuar për marrdhëniet e shkëlqyera mes dy vendeve, dhe nevojën për dialog mes Bullgarisë dhe Maqedonisë së Veriut.
“Sofje. Mëngjes pune me Presidentin Rumen Radev mbi marrëdhëniet e shkëlqyera bilaterale dhe nevojën për dialog mes palëve për zgjidhjen e ngërçit kritik mes Bullgarisë e Maqedonisë së Veriut (çka momentalisht pengon edhe thirrjen e Konferencës Ndërqeveritare BE-Shqipëri)”, ka shkruar Rama.
