Ministri i Turizmit, Kulturës dhe Sportit, Blendi Gonxhja, dha lajmin e mirë se pranë Lushnjës janë bërë zbulime të rëndësishme arkeologjike.
Specialistët e Institutit Kombëtar të Trashëgimisë Kulturore në bashkëpunim me Departamentin e Arkeologjisë dhe Trashëgimisë Kulturore në Fakultetin e Historisë dhe Filologjisë, si edhe të bashkisë Lushnjë kanë zbuluar një sit të ri arkeologjik në fshatin Zgjanë.
Gërmimet kanë nxjerrë në dritë gjurmët e një kompleksi termal të periudhës romake dhe ambienteve të lidhura me të. Ky zbulim arkeologjik konsiderohet si një nga më të rëndësishmit në zonën e Lushnjës, në dekadat e fundit.
Specialistët e IKTK-së do të vijojnë kërkimet dhe pritet të sjellin të dhëna të reja mbi historinë e zonës, duke shtuar potencialisht një monument të ri kulture dhe një atraksion të rëndësishëm për turizmin kulturor. /atsh
