“Vendi i Dëshmisë dhe i Kujtesës” në Shkodër po frekuentohet gjithnjë e më shumë nga turistë vendas dhe të huaj në këtë periudhë prag sezoni turistik.
“Kemi grupe të ndryshme që janë kryesisht amerikane, por gjithashtu kemi edhe grupe të tjera që vijnë nga rajone të veçanta të Evropës”, u shpreh historiani Xherardo Nikjari.
Vizitorët shprehen se ndihen të prekur nga historia e paraqitur në këtë muze, i cili ruan kujtimet e një periudhe të errët të komunizmit në Shqipëri.
“Vij nga Amerika, nga San Francisko. Dua të them, më frikëson ideja që diçka e tillë mund të ndodhë edhe në Amerikë, sinqerisht. Kam qenë vullnetar në Alkatraz, kështu që të shohësh njerëz në qeli të tilla nuk është edhe aq e pazakontë. Në fakt, këto janë pothuajse me të njëjtën madhësi si ato në Alkatraz. Por këto duken shumë më të errëta, më kërcënuese. Duket çnjerëzore. Dhe më bën të mendoj se njerëzit që e bënë këtë ishin thjesht njerëz të zakonshëm. Si të burgosurit, ashtu edhe torturuesit ishin njerëz që përpiqeshin të jetonin jetën e tyre… edhe pse disa prej tyre, ndoshta, e pëlqenin të torturonin.”
“Ne jemi nga Austria dhe po vizitojmë Shqipërinë për një javë. Gjatë qëndrimit tonë po vizitojmë shumë projekte dhe komunitete të ndryshme. Për disa prej nesh është hera e parë këtu; për mua është hera e dytë, ndërsa për vëllain tim ndoshta hera e katërt ose e pestë. Sapo kemi nisur udhëtimin tonë, por është shumë e rëndësishme për ne të njohim historinë e Shqipërisë. Veçanërisht duam të kuptojmë arsyet e periudhës së komunizmit dhe çfarë ndryshoi pas asaj kohe”, thanë disa nga vizitorët e huaj.
Në guidën turistike të qytetit të Shkodrës, përveç Muzeut Historik, Kalasë “Rozafa” dhe Muzeut Kombëtar të Fotografisë “Marubi”, përfshihet edhe “Vendi i Dëshmisë dhe i Kujtesës”. I hapur në mjediset e ish-Degës së Punëve të Brendshme të periudhës komuniste, ky muze është unik në Shqipëri.
Gazetar: M. RAKAJ
/rtsh.al/
