Federata Panshqiptare Vatra me Nolin në mes, Boston, Copley Plaza Hotel, 1920. Vihet re mungesa e Faik Konicës, i cili në atë kohë jetonte në Itali si delegat i Vatrës. Ai u kthye në Amerikë në vitin 1921 me ftesë të organizatës për t’u bërë kryetar i saj. Noli dhe Konica ishin miq dhe bashkëpunëtorë të ngushtë në atë kohë, por miqësia e tyre u kris pas Revolucionit të Qershorit
Më 8 janar 1925, pas përmbysjes së Revolucionit të Qershorit, rikthimit të Ahmet Zogut, dhe largimit të Fan Nolit e ministrave të tij në emigrim, Faik Konica i dha një farë mbështetje qeverisë së re, duke treguar edhe arsyet. Pretendimet e Konicës krijuan edhe pakënaqësi te Noli.
Kryetari i Vatrës, Faik Konica, duke shkruar në gazetën Dielli shpreh qëndrimin e tij rreth qeverisë së re të Ahmet Zogut. “Çfarë duhet të bëjmë? Ne mund të bëjmë njërën prej të dyjave; të ruajmë paqen që kemi; ose të mbështesim qeverinë e re, jo për programin e saj, por për të vendosur rendin dhe qetësinë. Ata që thonë se Zogu është tradhtar, duhet të shohin për rreth dhe do të zbulojnë se shumica e shqiptarëve mund të jenë cilësuar tradhtarë në një kohë a një tjetër. Unë paraqes këto teza: një njeri që ka mbështetjen e shumicës së popullit ka të drejtë t’a qeverisë atë popull. Shqiptarët nuk duan reforma dhe as reformatorë, ata nuk duan gjëra të reja dhe as njerëz që përpiqen t’i sjellin ato.”
Konica në fakt ka dashur të thotë se ata që u larguan me Nolin në krye ishin reformatorët e vërtetë, por Shqipëria ishte e prapambetur dhe nuk i mbështeti siç duhej.
Faik Konica u emërua ambasador i Shqipërisë në SHBA, ndërsa Noli qëndroi në emigrim gjatë jetës. Ahmet Zogu u shpall mbret dhe qeverisë Shqipërinë deri në pushtim italian, më 1939.
